ହଁ, ମୁଁ ପୁରୁଷଟିଏ

ହଁ ମୁଁ ପୁରୁଷଟିଏ

ସର୍ବସଂହା ବୋଉର କୋଳରେ

କୁଆଁ କୁଆଁ ରୋଦନରେ

ତା ଓଠରେ ହସ ଭରିଦେଉଥିବା

କୁନି ଛୁଆଟିଏ ।

ହଁ ମୁଁ ପୁରୁଷଟିଏ

ବାପାଙ୍କ କାନ୍ଦରେ ବସି

ନିଜ ଇଚ୍ଛାର

ଦୁନିଆ ଦେଖିଥିବା

ଅଝଟ ପିଲାଟିଏ ।

ହଁ ମୁଁ ପୁରୁଷଟିଏ

ଭଉଣୀର ଲୁହରେ

ନିଜକୁ ସାରା ଜୀବନ

ବନ୍ଧକ ରଖିଦେଉଥିବା

ସ୍ନେହର ଭାଇଟିଏ ।

ହଁ ମୁଁ ପୁରୁଷଟିଏ

ପ୍ରେମିକାର ପ୍ରତାରଣା ପରେ

ଏକା ଏକା ସାରା ରାତି 

ନିଜ ଲୁହ ନିଜେ ପିଇଥିବା

ଅବୁଝା ପ୍ରେମିକଟିଏ ।

ହଁ ମୁଁ ପୁରୁଷଟିଏ

ତୁମ ସୁଖ ଦୁଃଖରେ

ପାଦରେ ପାଦ ମିଶାଇ

ଏ ଜନ୍ମରୁ କାହିଁ କେତେଜନ୍ମ

ପ୍ରତିବଦ୍ଧ ଥିବା ସାଥିଟିଏ ।

ହଁ ମୁଁ ପୁରୁଷଟିଏ

ସୁଖର ପେଡିରେ

ସମୁଦ୍ରେ ଦୁଃଖକୁ

ଲୁଚାଇ ଦେଉଥିବା

ମଣିଷଟିଏ ।

ହଁ ମୁଁ ପୁରୁଷଟିଏ

#ଗଳ୍ପକବିତା

ହିମାଂଶୁ ଭୂଷଣ ସାହୁ

ସୋଲଗାଡ଼ିଆ

ଆମେ ହେବୁ ଖାଣ୍ଟି ଓଡ଼ିଆ

ସକାଳ ହେଲା କା କା କରି କାଉ ରାବିଲା

ନିଦୁଆ ନିଦୁଆ ଅଳସ କଥାରେ

"ବାବା..କ୍ରୋ..'କ୍ରୋ.."କହି ପୁଅ ରଡ଼ିଲା ।

ଥଣ୍ଡାପାଣି କିଛି ଛିଞ୍ଚି ମୁହଁରେ ପୁଅକୁ ଧରିଲି ଯତନେ

ପତ୍ନୀ ହସ ହସ ମୁହେଁ କହିଗଲେ

"ନିଅ… ତୁମ ବେଡ଼୍ ଟି, ଆଉ ପୁଅର ମେଡ଼ିସିନ୍ ପାନେ ।

ଶୌଚ ସ୍ନାନାଦି ସମାପ୍ତ କରିଣ ପୂଜାରେ ବସିଲି ଯାଇ

ହିନ୍ଦୀ ଉର୍ଦୁ ମିଶା ବଲିଉଡ୍ ଭଜନ

କାନରେ ଜାଣ , ବାଜୁଥାଏ ଧାଇଁ ଧାଇଁ ।

ଚୁଡା,ଗୁଡ଼,ଦହି ନଡ଼ିଆ କୋରାର ଜଳଖିଆ ଦେଲି ଖାଇ

ଭାଇ ! "ନୁଡୁଲ୍ସ ର ସମୋସା ଆଣିଥିଲି ପରା… !"

ମୁହଁ ଓହଳେଇ , କହୁଥାଏ ସାନ ଭାଇ ।

ଖବରକାଗଜ ଧରିଣ ହାତରେ ଛାତଉପରକୁ ଗଲି

"ପୂଜୋ ରେ ରିହାତି"ଆଉ ଫିଲ୍ମ "ଦିଲ୍ କରେ କ୍ରାନ୍ତି"

ଅନେଇ କାଗଜକୁ , ମୋଡ଼ି କରି ଫିଙ୍ଗିଦେଲି ।

ପତ୍ନୀ ସଜବାଜ ହୋଇସାରିଥିଲେ ଦଶହରା କିଣା ପାଇଁ

ବରାଦ ଆସିଲା ବୋଉ ବାପାଙ୍କର

"ଛୋଟା ଭୀମ୍ ଖେଳନା , ଆଣିବୁ ତ ନାତି ପାଇଁ !!!"

ଦୁଇଚକା ଯାନେ ଯାତ୍ରା ଅରମ୍ଭିଲୁ ପାଖ ବଜାର ଦେଖି

ମେହେନ୍ଦୀ , ଲେହେଁଗା , ପାୟଲ , ବିନ୍ଦି

ପତ୍ନୀ କେତେ କ'ଣ , କିଣିଲେ ପରଖି ନିରେଖି ।

ଭୋଜନ "ଓଡ଼ିଆ ହାଣ୍ଡିଶାଳ"ରେ ଖାଇଲୁ ସାଉଥ ଇଣ୍ଡିଆ ଥାଳି

ହାକୁଟି ଯେ ଦେଲା ଆମ୍ବିଳା ଆମ୍ବିଳା

ଓଡ଼ିଆପଣ ଯେ ଗଲା ମୋର ଢଳି ।

ବଜାରେ ଦେଖିଲୁ ପୁସ୍ତକ ମେଳା ଥାକଥାକ ଯେ ଇଂଗ୍ରେଜୀ ବହି

ଭିଡକୁ ଖେଳେଇ ପିଲାଙ୍କ ବହିଟେ ଖୋଜିଲି

'ଔ' ଶବ୍ଦ ରେ 'ଔରତ' ପାଇଲି ଯାଇ ।

ଡ଼ାକବାଜି ଯନ୍ତ୍ର କୁହାଟ ବାଜିଲା ସାହିତ୍ୟ ସଭା ପାଖରୁ

 "ଆମେ ହେବୁ ଖାଣ୍ଟି ଓଡ଼ିଆ ମଣିଷ"

ଓଡ଼ିଆତ୍ୱ ଝରିବ , ସୋସିଆଲ ମିଡିଆ କଲମ ମୁନରୁ ।

ମୁହଁ ସଞ୍ଜ ଦେଖି ପରିବା କିଣିକି ବାହୁଡିବା ପାଇଁ ଭାବିଲୁ

"କାନ୍ଦା ଲକୀ ମିର୍ଚି ଦସ୍ କେ ପାଞ୍ଚ"

ଡାକୁଥିବା ବିକାଳିଟି ହାତରେ, ଶହେ ନୋଟ ଧରେଇ ଆସିଲୁ ।

"ବାବା ବାବା"କହି ଆଲିଙ୍ଗନ ଦେଇ ଚୁମାଟିଏ ପୁଅ ଦେଲା

ଖେଳନା ସହିତ ଏ ବି ସି ଡ଼ି ବହିଟିଏ ଦେଇ

ପତ୍ନୀ ବୋଉଙ୍କୁ କହିଲେ , "ଆଜି ମାର୍କେଟରେ ଭିଡ଼ ଥିଲା ।"

ନୈଶ ଭୋଜନ ଆତ୍ମତୃପ୍ତି ପରେ କାବ୍ୟ ବହିଟିଏ ଧରିଲି

ପୁଅକୁ ଶୁଏଇ ପତ୍ନୀ ଗୁଡ଼ ନାଇଟ୍ କହିଲେ

ଲଭ,ୟୁ,ଠୁ,ଡାର୍ଲିଂ କହି , କବିତା ପଢିବାରେ ମନ ଦେଲି ।

                       #ଗଳ୍ପକବିତା

ହିମାଂଶୁ ଭୂଷଣ ସାହୁ

ସୋଲଗାଡ଼ିଆ

ଢେଙ୍କାନାଳ

କବିତା:-ଗୋଟିଏ ଉତ୍ତର ଜାଣିବାକୁ ଥିଲା...

ଗୋଟିଏ ପ୍ରଶ୍ନ ଥିଲା ତୁମ ଓଢଣୀକୁ

ମୋ ଶ୍ଵାସରୁଦ୍ଧ ବେଳେ

କେମିତି ସେ ନିର୍ଦ୍ୱନ୍ଦରେ ଉଡୁଥିଲା ?

ଗୋଟିଏ ପ୍ରଶ୍ନ ଥିଲା ତୁମ ଟିକିଲିକୁ

ମୋ ଶେଥାଶେଥା ଚେହେରା ବେଳେ

କେମିତି ସେ ଝଟକୁ ଥିଲା ?

ଗୋଟିଏ ପ୍ରଶ୍ନ ଥିଲା ତୁମ କପାଳକୁ

ମୋ ଭାଗ୍ୟର ଦୁର୍ଦ୍ଦିନରେ

କେମିତି ସେ ଚମକୁ ଥିଲା ?

ଗୋଟିଏ ପ୍ରଶ୍ନ ଥିଲା ତୁମ ଅଧରକୁ

ତୁମ ନାଁ'ର ମୋ କମ୍ପନରେ

କେମିତି ସେ ହସୁଥିଲା ?

ଗୋଟିଏ ପ୍ରଶ୍ନ ଥିଲା ତୁମ ହୃଦୟକୁ

ଅତୀତର ମୋ ଯନ୍ତ୍ରଣାରେ

କେମିତି ସେ ସ୍ପନ୍ଦିତ ହେଉଥିଲା ?

ଗୋଟିଏ ପ୍ରଶ୍ନ ଥିଲା ତୁମ ଦୁଇ ହାତକୁ

ମୋ ଲୁହ ଆଉ ଲହୁର ବର୍ତ୍ତମାନରେ

ସେ ଅନ୍ୟ ପାଇଁ କେମିତି ଚୁଡ଼ି ପିନ୍ଧିଥିଲା ?

ଗୋଟିଏ ପ୍ରଶ୍ନ ଥିଲା ତୁମ ପାଉଁଞ୍ଜିକୁ

ତୁମ ପାଇଁ ମୋ ସ୍ପନ୍ଦନରୁଦ୍ଧ ବେଳେ

କେମିତି ସେ ଛମ୍ ଛମ୍ ବାଜୁଥିଲା ?

ଗୋଟିଏ ଉତ୍ତର ଜାଣିବାକୁ ଥିଲା

ମୋ ପ୍ରଶ୍ନ ଆଉ ଲୁହ ପରେ

ତୁମ ମୌନତାର କାରଣ କ'ଣ ଥିଲା ? 

 #ଗଳ୍ପକବିତା

 ହିମାଂଶୁ ଭୂଷଣ ସାହୁ

ସୋଲଗାଡ଼ିଆ

ଢେଙ୍କାନାଳ