ଏବେ ଏବେ ବର୍ଷିଗଲା ଅସଳାଏ
ବେଉଷୁଣିଆ ବର୍ଷା !
ଆମ ଗାଁ କଂକ୍ରିଟ ରାସ୍ତାକୁ ଓଦା କରି
ନିଗିଡିଗଲା ମେଞ୍ଚେ ଅଳିଆ ଆବର୍ଜନା ନେଇ
ଜମାଟ ବାନ୍ଧିବାକୁ ଯେଉଁଠି ଡ୍ରେନ ଅଧା ଅଛି !!!
ବର୍ଷା !
କଂକ୍ରିଟ ରାସ୍ତାରେ ଚବ୍ ଚବ୍ କରୁଥିବା ଅଳତା ପାଦ ।
ବର୍ଷା !
ନିଗିଡ଼ା ଅଳିଆ ଭିତର କାଗଜରେ କବିତା ପଦ ।
ବର୍ଷା !
ଅଧା ମୁହଁ ଡ୍ରେନ ପାଖେ ରାଜନୀତି ଶବ୍ଦ ।
ସେଇ ଅଧା ମୁହଁ ଡ୍ରେନ ପାଖେ ଶେଉଳ ଧରିଛି
ଚେମା ନାଗ ର ପୁଅ !
ଆଖିରେ ମେଞ୍ଚେ ସ୍ବପ୍ନ ଆମ୍ବୁଲ ମାଛ ଝୋଳର
କିନ୍ତୁ ଚେମା କ'ଣ ଚାଖିବ ?
ସରକାରୀ ମଦଭାଟିରେ ତା ଶରୀର ପଡିଛି !!!
ବର୍ଷା !
କୁଡ଼ିଆକୁ ଭାଙ୍ଗି କୋଠାଟିଏର ରାଜନୈତିକ ଆଶା ।
ବର୍ଷା !
ବନ୍ୟା କ୍ଷୟକ୍ଷତିରୁ ଲୁଣ୍ଠିତ କୋଟି କୋଟି ଭରସା ।
ବର୍ଷା !
ଗରିବ ଦେଖିଥିବା ଏକ ଇନ୍ଦ୍ରଧନୁର ବିଦ୍ରୁପ ଲାଳସା ।
ଅଧା ଇନ୍ଦ୍ରଧନୁ ପୋତି ହୋଇଥିବ ନିଶ୍ଚନ୍ତା ତଇଲାରେ
ଯାଜପୁରର ଧୂଳିପ୍ରଦୂଷଣ ପାଇଁ ପିନ୍ଧିଥିବ ମାସ୍କ !
ଦିଶୁଥିବ ଅସହାୟ ରଙ୍ଗୀନ ସ୍ବପ୍ନଟେ ପରି
କିନ୍ତୁ କିଏ ଗଣିବ କେତେ ରଙ୍ଗ କେତେ ରକ୍ତ !
ବିଲ ମୁହାଣରେ ତ ଏଠି ଜୀବନ ଜୀବିକା ଭାସୁଛି !!!
ବର୍ଷା !
ଅଧା ଇନ୍ଦ୍ରଧନୁରେ ସମ୍ପୂର୍ଣ୍ଣ ପ୍ରେମର ନିଶା ।
ବର୍ଷା !
ଜୀବନ ଜୀବିକରେ ସବୁଜ ସ୍ବପ୍ନଭରା ଆଶା ।
ବର୍ଷା !
ଶୀତଳ ସମୀରେ ଉଜ୍ବଳ ଏକ ପ୍ରକୃତି ଭାଷା ।
କିଏ ଦେଖୁଛି ଏଠି ବର୍ଷା , ବିଜୁଳି , ପାହାଡ଼ି ଝରଣା ?
ବେଳ କାଇଁ ମୋବାଇଲ ସ୍କ୍ରିନରୁ !
ବେଳ କାଇଁ ରାଜନୀତି ବର୍ଷାରେ ଛତା ହଟେଇବାକୁ
ବେଳ କାଇଁ ବେଙ୍ଗବେଙ୍ଗୁଲି ଗପରେ ଜୀବନ ଜିଇଁବାକୁ
ବେଳ ନାହିଁ ,ଏଠି ବର୍ଷା ଏକା ଏକା ବର୍ଷି ଯାଉଛି ।
ବର୍ଷା !
ପିଲାଦିନେ ପାଦେ ପାଣିରେ ହୀରାକୁଦ ବନ୍ଧ ବାନ୍ଧୁଥିବା ସଖା ।
ବର୍ଷା !
କିଶୋର ଉଲଗ୍ନ ଶରୀରେ ଭୂତିଆପୋଲରେ ଡେଉଁଥିବା ଯୋଦ୍ଧା ।
ବର୍ଷା !
ଯୁବକ ଉନ୍ମାଦରେ ମୁହଁ ଭିଜା ଓଦାଓଦା ପ୍ରେମର କବିତା ।
◆◆◆
#ଗଳ୍ପକବିତା
ସୋଲଗାଡ଼ିଆ , ଢେଙ୍କାନାଳ ୭୫୯୦୧୬
