ନାରୀଟିଏ ତ ମାତ୍ର...

ନାରୀଟିଏ ତ ମାତ୍ର !

ସର୍ବସଂହା ଅର୍ଥରେ

ତୁମ ପଙ୍ଗୁ ପୁରୁଷତ୍ୱକୁ ସହିବା ପାଇଁ ବାଧ୍ୟ ସେ ।

ତୁମେ ଆଉ ବଡ଼ପଣ ଦେଖାଅ ନାହିଁ

ବିଦ୍ରୋହ-ବିକ୍ଷୋଭ-ବିଚାର କହି ,

ଆଇନା ଆଗରେ ନଗ୍ନ ଥରେ ହୋଇଯାଅ !

ଦେଖିବ ତୁମ ମନରେ କେତେ ଧର୍ଷିତାଙ୍କ ଚିତ୍କାର

ସେ ଆଇନା ଭିତରେ !

ନାରୀଟିଏ ତ ମାତ୍ର !

ପତ୍ନୀ-ଜନନୀ-ଭଗିନୀ ଅର୍ଥରେ

ତୁମ ଦୈତ୍ୟତାକୁ କ୍ଷମା କରିବାକୁ ବାଧ୍ୟ ସେ ।

ତୁମେ ଆଉ ଅଭିନୟ କରନାହିଁ ,

ରାଜ୍ୟ ,ସମ୍ପ୍ରଦାୟ ,ଦଳ ,ବଳ କହି ।

ଆଖି ଖୋଲ ଦେଖିବ ଅନେକ ଅସହାୟ ପିଡ଼ିତା

ସେ ଦଳୀୟ ଭିତରେ ।

ନାରୀଟିଏ ତ ମାତ୍ର !

ସେ କାହୁଁ ଜାଣିବ ବିକ୍ଷୋଭ !

କାହିଁକି କରିବ ପ୍ରତିବାଦ ?

କାହିଁକି ନେବ ପ୍ରତିଶୋଧ ?

କାହିଁକି ମାଗିବ ନ୍ୟାୟ ?

କାହାପାଇଁ ରଖିବ ନିଜପକ୍ଷ ?

ସେ କାହିଁକି କରିବ ବିଚାର ?

କେମିତି ମାଗିବ ତୁମ ପୌରୁଷର ହିସାବ ?

କାହିଁକି ଜାଣିବ ଅଧିକାର ?

କଣ ତାର ପ୍ରୟୋଜନ !

କେଉଁଠି ଅବା ତାର ସ୍ଥାନ ?

ଆସ ଆଜି ହିସାବ କରିବା

ତୁମ , ତା ଦେହର

ତୁମ , ତା ମନର

ତୁମ , ତା ଇଛାର

ତୁମ , ତା ଭକ୍ତିର

ତୁମ , ତା ସମର୍ପଣର

ତୁମ , ତା ଆବେଗର

ତୁମ , ତା ତ୍ୟାଗର

ତୁମ , ତା ଶକ୍ତିର ।

ହଁ ,

ନାରୀଟିଏ ତ ମାତ୍ର !

ସେ ସର୍ବସଂହା ଅର୍ଥରେ

ଦେହ-ମନ-ଇଛା ତ୍ୟାଗରେ !!!

ତୁମେ ଆଉ ହିସାବ ମାଗନାହିଁ

ପ୍ରଭୁତ୍ୱ ଦେଖାଇ ,

ଥରେ ମଗ୍ନ ହୋଇ ହଜିଯାଅ ତା ଔରସରେ

ଦେଖିବ ଲକ୍ଷ ଲକ୍ଷ ନିଜତ୍ବର ନାରୀଟିଏ

ନିଜ ଭିତରେ ।

◆◆◆

#ଗଳ୍ପକବିତା

✍️ହିମାଂଶୁ ଭୂଷଣ ସାହୁ

ସୋଲଗାଡ଼ିଆ

ପୁରୁଷ କମିଶନ

 ବାଣୀବିହାର ଓଭର ବ୍ରିଜ ତଳେ ତା ବସ୍ ରେଳ ଷ୍ଟେସନ ଆଡୁ କଟକ ଅଭିମୁଖେ ମୋଡ଼ିଲା ପରେ ପରେ ସେ ଦେଖିପାରିଲା ଜଏନ୍ ପୁରୁଷ କମିଶନ୍। ତା ତଳେ ଗୋଟିଏ ମୋବାଇଲ ନମ୍ବର । ପ୍ରାୟ ଆଠଟି ଜାଗାରେ । ଏକା ଲେଖା ।

   ସେ ତା ମୋବାଇଲ ବାହାର କଲା । ନମ୍ବର ଗୋଟି ଗୋଟି କରି ସ୍କ୍ରିନ ରେ ଚୟନ କରି ରହିଗଲା । ହୁଏତ ଶେଷ ଥର ପାଇଁ କିଛି ଭାବୁଥିଲା , ହଠାତ ଫୋନ ଆସିଲା । 'ବୋଉ...'

    ବୋଉଙ୍କ ତାଗିଦ ଥିଲା "ତୋ ଭାରିଯାକୁ ନେଇ ତା ବାପଘରେ ଛାଡ଼େ ନଚେତ୍ ମୋ ମଲାମୁହଁ ଦେଖିବୁ ।"

    କିଛିଦିନ ପୂର୍ବରୁ ପତ୍ନୀ କହୁଥିଲା "ତୁମ ବୋଉକୁ ନେଇ କେଉଁ ବୃଦ୍ଧାଶ୍ରମରେ ଛାଡ଼ ନଚେତ ମୋ ମଲା ମୁହଁ ଦେଖିବ ।"

     ମୃତ୍ୟୁ ଏତେ ସହଜ ହୋଇଥାନ୍ତା କି ? ଅନ୍ତତଃ ନିଜେ ଥରେ ସେ ଦୁହିଁଙ୍କୁ କଥା ଛଳରେ କହିଦେଇଥାନ୍ତା "ତୁମେ ଦୁଇଜଣ ଚୁପ୍ ରୁହ ନଚେତ୍ ମୋ ମଲା ମୁହଁ ଦେଖିବ ।"

    ଏତେ ବର୍ଷ ନିଜେ ଚୁପ୍ ରହି ରହି ପଥର ପାଲଟି ଗଲାଣି ସେ । ସେ ପଥରରେ ଏ ପୁରୁଷ କମିଶନ କି ମୂର୍ତ୍ତି ଗଢ଼ି ପାରିବ ? କେବଳ ନାରୀ ସର୍ବସଂହା ନୁହେଁ । ପୁରୁଷ ମଧ୍ୟ ଗୋଟିଏ ଗୋଟିଏ ପୃଥିବୀ ନିଜ ନିଜ ଭାଗ୍ୟର ।

    ଲୋକଟି ମୋବାଇଲକୁ ପକେଟରେ ରଖିଲା । ଓଭରବ୍ରିଜ ପାରି ହୋଇ ଗାଡ଼ିଟି ମୁଖ୍ୟ ରାସ୍ତା ଧରି ସାରିଲାଣି । ଗୋଟିଏ ନୂଆ କପଲ୍ ବସିଥିଲେ ଠିକ୍ ତା ସାମ୍ନା ସିଟ୍ ରେ । ତାଙ୍କୁ ଦେଖିଲା ଆଉ ଗାଡ଼ିରେ ବାଜୁଥିବା ପୁରୁଣା ଓଡ଼ିଆ ଚଳଚ୍ଚିତ୍ର ଗୀତ ସହ ନିଜ ସ୍ୱର ମିଶାଇ ଗୁଣୁଗୁଣାଇଲା ମନେମନେ ।

                                ◆◆◆

ହିମାଂଶୁ ଭୂଷଣ ସାହୁ

#ଗଳ୍ପକବିତା